મિત્રો ચોમાસાની સિઝન શરૂ થઇ ગઇ છે અને વરસતા વરસાદમાં દરેક લોકોને ચટપટું ખાવાનું મન થાય છે. આપણે ત્યાં ચોમાસાની સિઝનમાં ભજીયા ખાવા એ પ્રકારના રિવાજ જેવું થઈ ગયું છે જેવોજ વરસાદ થાય કે લોકો તરત જ ભજીયાનો પ્રોગ્રામ રાખી દે છે. આપણે ત્યાં અનેક પ્રકારના ભજીયા ખાવા માં આવે છે. પરંતુ જે લોકો તીખુંતમતમતું ખાવાના શોખીન હોય તેના માટે ભરેલા મરચા સૌથી શ્રેષ્ઠ ઓપ્શન છે. તો ચાલો જાણીએ કઈ રીતે બનાવશો ભરેલા મરચા ના ભજીયા.
સામગ્રી:-
જરૂરી તીખાસ મુજબના આખા મરચા,
1 કપ ચણાનો લોટ, 1 કપ ચોખાનો લોટ, અડધી વાટકી ચણાની દાળ, એક ચપટી બેકિંગ સોડા, અડધી ચમચી લાલ મરચું પાઉડર, 1 ચમચી લીંબુનો રસ, અડધી વાટકી સુકુ ખમણ, એક ચમચી આખા ધાણા, એક ચમચી તલ અને અજમા, લોટ બાંધવા પાણી, તળવા માટે તેલ, મીઠું સ્વાદાનુસાર,
બનાવવાની રીત:-
સૌપ્રથમ મસાલો બનાવવા માટે એક પેનમાં આખા ધાણા, ચણાની દાળ અને આજમાં તથા તલ ભેગા કરી બરાબર હલાવી લો. ત્યારબાદ આ મિશ્રણને બે થી ત્રણ મિનિટ સુધી ધીમી આંચ પર શેકો. શેકાઈ ગયા બાદ આ મિશ્રણને ઠંડુ પાડી તેનું એકદમ ઝીણો પાવડર કરી લો. ત્યારબાદ આ પાવડરમાં સ્વાદ અનુસાર મીઠું સુકુ ખમણ એક ચપટી ખાંડ અને લીંબુનો રસ ભેળવીને બરાબર હલાવી લો. આ રીતે તૈયાર છે મરચા ની અંદર ભરવાનો મસાલો.
ત્યારબાદ આખા મરચા લઈ તેને પાણીથી બરાબર સાફ કરી તેમાં વચ્ચે એક ચેકો કરો. ચેકો કર્યા બાદ તેની અંદર ના બધા જ બીજ દૂર કરી લો. અને ત્યારબાદ તેમાં આપણે બનાવેલો મસાલો ભરી લો. હવે એક પેનમાં થોડું પાણી લઈ તેમાં ચણાનો લોટ ચોખાનો લોટ એક ચપટી બેકિંગ સોડા અને થોડું લીંબુ નાખી મરચા પર ચોટે તેટલું ઘાટું ખીરું તૈયાર કરો. ત્યારબાદ તેમાં સ્વાદ અનુસાર થોડું મીઠું ભેળવો. એક પેનમાં તેલ ગરમ કરવા મુકો. જ્યારે તેલ બરાબર આવી જાય ત્યારબાદ ભરેલા મરચા ને આ લોટમાં ડુબાડી તેલમાં તળવા મૂકો.
જ્યારે ભજીયા તળાઈને આછા ગુલાબી રંગ જેવા થાય અને એકદમ કડક બની જાય ત્યારબાદ તેને એક સર્વિંગ પ્લેટમાં કાઢી લો અને તમારી મનભાવતી ચટણી સાથે સર્વ કરો.
લેખન અને સંપાદન : ટીમ ગુજ્જુ ગપશપ
નોંધ:
તમે આ લેખ “ગુજ્જુ ગપશપ” ના માધ્યમ થી વાંચી રહ્યા છો. જો તમને આ લેખ પસંદ આવ્યો હોય તો અન્ય મિત્રો સાથે Share કરજો.
આ લખાણ ની કોપી કરતા પહેલા અમારી લેખિત મંજૂરી લેવી જરૂરી છે.